HELP WANTED (part 4)

Inday#4:   Sa kadugayan, nakakuha ra gyud intawn mi ug katabang.  Usa ka dalagita nga gikan sa uma.  Tungod sa nilabayng "rice crisis"  nihangyo ang mga ginikanan nga magkatabang ilang anak. Pa-eskwelahon lang  bahala’g wala’y sweldo basta hatagan lang ug baon kada adlaw.  Naa na pud ta aning "scholar" nga katabang! Hala sige, maayo na lang kaysa wala!  Utong! 

Ug sa dihang… wala’y nahibaw-an!  Dili kabalo magluto, kami gihapon luto. Nanimaho gihapon ug sabon ang mga baso, magputi-puti pa ang mga kutsara inig human ug hugas, usabon namo ug hugas. Ang mga nilabhan murag bulingon man gihapon, usabon intawn nako ug laba. Inig ka uga sa mga hinayhay, magtapun-og ka gihapon sa butanganan.  Kung dili suguon (with demonstration pa gani) dili pud pamiluon. Ang mga duwa-an sa bata, madugmok intawn kay matumban kay kung dili suguon nga hipuson, pasagdan lang pud. Gitubuan na intawn ug sibuyas, kamatis ug kalabasa ang ibabao sa TV ug istante sa mga figurines, kay wala intawn trapuhi kay wala suguo-a. 

"Tart, nindot kaayo atong kwarto. Murag beach."   Balason na intawn ang salog kay wala silhigi.  Tag-ana nganong wala nasilhigan?

Akong itugon ang salog sa kwarto dayon namong lakaw para mag-opisina.  Inigbalik namo sa hapon, nanilhig tuod! Pero abog  ang ibabao sa TV ug speakers sa component.  Mangutana pa ko ngano? Sorry, sayop nako nganong ang salog ra akong gitugon!

Himan-himan pa ni-ana, pwerteng puti-a sa nawng, murag ungo!  Diay, samtang wala mi ug nanglimpyo (nanilhig ra diay) kuno sa kwarto, nanghilabot sa akong make-up ang karaho! (nosebleed…)

 

Help Wanted:  Tabangi intawn ko ninyo unsaon nako pagsakop ug tarong nga katabang!!!

HELP WANTED (part 3)

Inday#2:   Tungod kay mas dako ang mawala namong mag-asawa kung magpuli-puli lang mi ug absent para naay mahabilin sa bata. Magkuha mi ug laing katabang.  Naay gi-rekomenda ang kauban nako sa opisina.  Magkita daw mi atong mu-apply inig ka-Sabado sa city hall kay aron matultulan ang among balay.  Tinuod, niabot sa takdang panahon.  Pero wala’y gamit o dakong bag nga bitbit.  Busa, akong gipangutana kung nganong wala siya’y dala.  Ang tubag, "Wala pa ko kadesider kung maka-uyon ko sa inyo."  Agay, kasakit sa akong dunggan.  Abi nako siya ang mu-apply pagka-katabang ngari namo, kami diay ang nang-apply pagka-amo ngadto niya!  (nosebleed…)

 

Inday#3: Wala gihapon ni makakita ug katabang unya dili na ma-apas ang kadaghan sa labhunon, busa magkuha mi ug labandera nga sinemana.  Naay nagpresentar nga labandera kuno.  Ang kahitabo sa interview…

          Kami:  Pila man ang imong singil?

          Labandera:  200 mam.  Naa moy washing machine?

          Kami:  Naa.

          Labandera:  Twin tub?

          Kami:  Oo.

          Labandera:  Pila ka kilo ang kapasidad sa inyong washing (machine)?

          Kami: 6 kilos. 

          Labandera: Unsa inyong tubig? Water district? Deep well? O bumba?

          Kami: Kadiyot lang ha…. Apil na plantsa?

          Labandera:  Aw, wala’y labot plantsa mam oy.  Labandera man ko, dili man ko plantsadora.

          Kami:  Ang buot nimo pasabot, sa 200 ang imong buhaton, mag lunod ug bulingon sa washing   machine ug magpa-agas ug tubig?!  Dili baya mi mga baldado, day!   (nosebleed…)

HELP WANTED (part2)

Si Inday

Pastilan! Karon nga naa na ko’y pamilya ug naglain na ug panimalay, daghang mga Inday na ang ni-agi kanamo.  Pero, ugtas lang akong na-ani.

 

Inday #1:   Sa tinuod, mao kini ang pinakadugay namong katabang.  Nagsugod siya nga yaya sa akong 1-year old nga anak.  Maayo ug systematic pud mutrabaho.  Paspas ang pick-up sa mga instructions.  Naay siya’y ambisyon mahimong "teacher" mao nga sa iyang ika-duhang tuig ngari namo, among gipa-eskwela sa night high school.  Alas-4 sa hapon hangtod alas-9 sa gabii ang iyang klase. Sa sinugdanan, quarter to 3pm ihatod niya ang iyang gibantayan nga bata sa akong opisina.  Sa kadugayan, alas-3 palang naa na ang bata sa opisina. Unsa gyu’y sayohan?   Sa sinugdanan, alas-9:15 naka-uli na sa balay.  Sa kadugayan, alas 10:30 na lang wala pa naka-abot.  Unsa gyu’y dugayan?  Among nabantayan nga nausab na ang batasan ug ang agi sa trabaho nagkayamukat na. Magpunay na lang ug text.  Masunog na ang nilung-ag, magtapok na ang labhanan.  Ug sa dihang… naka-uyab diay ug classmate!  Pwede untang palampason, basta magtarong lang ug eskwela ug dili pasagdan ang mga trabaho sa balay.  Sa dihang… ni-uli ko nga wala sa oras kay naa’y kuhaon, akong namatikdan nga ang bata naa lang sa kwarto namo ug naginusarang nagduwa.  Asa man ang yaya ani?  Murag naa’y ga-inagik-ik sa kwarto sa among katabang.  Akong gitawag iyang pangalan.  Sus, naa may lalake nikaratil ug dagan ug nilipot didto sa likod sa balay.  Ang panuway… gihimong motel ang among panimalay samtang tu-a mi sa trabaho!  (nosebleed…)

HELP WANTED (part 1)

Nganong lisod man jud kaayo makakita ug maayo nga katabang karong panahona? Ang dili nako masabtan kung ngano nga ang akong mga amiga nga pwerteng ka-mangtas ug ka-estrikto, mga tarong man ang mga katabang! Pero ako nga buotan man unta, pinangga ug pagustohan lang man gani basta mahuman lang ug tarong ang trabaho, matungnan man sa mga katabang nga tapulan, usikan, hugawan ug ugok!

Si Linda

Dili kaha ako ang naay diperensya?  Taas ra kaha kaayo ang akong standards or expectations sa mga katabang?  Sala jud ni tanan ni Nanay Linda!!!!

Si Nanay Linda, yaya sa akong manghud. Nga nahimong yaya sa akong kinamagulangang anak. Nga nag-yaya usab sa mga anak sa akong manghud. 

Dagko na ang among mga anak.  Dili na kinahanglan bantayan.  Sulod sa taas na kaayo nga panahon, wala mausab ang kalidad sa iyang trabaho.  Bisan karon mga medyo may edad na siya, limpyo ug hapsay gihapon ang tibuok namo nga pinuy-anan.

Ni-adtong mga estudyante pa kaming magsuon, inig mata namo sa buntag naa nay pamahaw nga naghulat.  Inig ilis namo, limpyo ug plantsado na ang among mga uniform ug mga baon nga extra t-shirt. Kumpleto ang among mga gamit. Dili na kinahanglan pangitaon ang panty, bra, medyas ug panyo.  Nahimutang na daan sa among tagsa-tagsa ka mga butanganan. Kada adlaw manglaba si Nanay.  Wala pa ma-uso ang washing machine ug fabric conditioner niadtong panahona.  Pero ang mga sanina limpyo ug humot kayo. Kutob sa makit-ang sinsilyo sa bulsa, bisan 25 centavos, iya kining i-uli kanamo. Samtang gihulat nga ma-uga ang mga nilabhan, manglimpyo siya sa mga kwarto ug sa sala.  Ang kusina ang katapusang malimpuhan kay magluto pa man siya ug pani-udto.  Inig human ug panga-on, siya ang manghugas sa mga kinan-an. Mupahuway siya ug kadiyot.  Ang iyang pahuway mao ang pagpaminaw ug drama sa radio mintras gipilian ug tipasi ug bato-bato ang bugas.  Igo nga mahuman ang programa sa radio (Handumanan sa Usa ka Awit), mangutaw na si Nanay kay uga na ang iyang nilabhan pagka-buntag.  Mangutaw si Nanay nga gamit ang kinaraan nga de-uling nga plantsa. Apan walay sanina nga nasunog o nahabiling kun-ot.  Usahay, ipadayon niya ang pagpaminaw sa radio, sa ubang mga higayon magtan-aw siya ug TV (That’s Entertainment) mintras mangutaw.  Inig kahuman, iyang hapnigon ang mga butanganan sa mga sinina ug ipahimutang ang mga pinalantsa.  Ni-ining higayona, musulod siya sa iyang lawak ug mupahuway.  Igo nga mag-alas 6, mugawas siya ug balik aron mag-andam sa panihapon.  Dili na siya maghuwat nga mga defrost ang karne o isda kay iya nang-gipagawas daan sa freezer sa dili pa siya mamalantsa. Alas 7 ang among na-andan nga tingkaon inigka-gabii. Inig kahuman ug panghugas, makig-uban siya namo maglantaw ug TV, samtang  manahi siya sa nga sanina nga naay gisi ang ilok o bilahan, o natastas nga mga sidsid. Matulog na si Nanay inig alas-9. Ug balikon ang iyang agi sa ugma nga mu-abot.

 Graduate na sa nursing ang anak ni Nanay Linda. Naa na siya’y igsoon nga iyang natabangang makagawas ug tu-a na karon sa London nagtabaho, naminyo ug maayo ang kahimtang.  Apan bisan nga nagdawat siya ug regular nga pasalamat gikan sa iyang manghod, naa gihapon si Nanay Linda sa among panimalay.  Gani, wala na namo siya gitrato isip katabang, kun dili myembro sa pamilya.  Sa tinuod, mas daghan pa ug tinigum nga kwarta si Nanay  nga utangan gyud namo siya usahay! Tungod tingali nga mao kini ang akong gidak-an nga kalibre sa katabang, mao usab kini ang akong gipangita.